A nuk e dini se feja Islame gjatë periudhës së saj të lulëzimit... a nuk e dini se popujt e huaj, ata që nuk flisnin arabisht, çfarë u bënë? U bënë arabë. I çoi nevoja që të mësonin arabishten. Madje, kishte të tillë që u bënë dijetarë të gjuhës arabe. El-Fejruz Abadi, Allahu e mëshiroftë, ishte me origjinë nga Persia. Megjithatë, ai shkroi fjalorin “el-Kamus El-Muhit,” të cilit njerëzit i referohen sot e kësaj dite për gjuhën arabe. Ngase i dobëti gjithmonë imiton të fortin.

Kur Islami ishte i fortë, gjuha Arabe u bë dominuese dhe njerëzit u detyruan ta mësojë atë. Ndërsa tani është krejtësisht e kundërta. Tani, nëse njeriu i mëson vetëm shkronjat e gjuhës Angleze – e ku më të thur fjali dhe të mësojë – krenohet dhe fryhet. Madje, disa ua mësojnë fëmijëve të tyre gjuhën angleze dhe fëmijës së tij nëse do ta përshëndet, i thotë: “Mos thuaj: ‘Esselamu alejkum, por thuaj: ‘Bye Bye (mirëupafshim!).’” Çfarë është kjo “Bye! Bye”!!!

Ngase “Bye, bye” është gjuhë e një populli të cilët kanë superioritet, kurse ne jemi të dobët. A deri në këtë shkallë kemi mbërritur, o xhemat!? Nëse i thua fëmijës: “Me’a selam (Të priftë e mbara!) ,”  “Fi emanil-lah (Qofsh në mbrojtjen e Allahut),” “Esselamu alejkum,” kurse ai ta kthen: “Bye! Bye!”

Prej Allahut kërkojmë ndihmë!  Përse kështu?! Ngase babai i tij e ka mësuar kështu dhe fëmija jeton në bazë të asaj që e ka mësuar babai i tij.

E rëndësishme, o vëllezër, unë them: E kemi për obligim të krenohemi me fenë tonë. Ngase krenaria dhe madhështia i takon Allahut, të Dërguarit të Tij dhe besimtarëve. Të mos bëhemi bishta të tyre në gjëra që ne nuk kemi ndonjë dobi.

T’i imitosh ata në industri dhe dobi të tjera që Allahu i ka sjellë në tokë, atëherë kjo nuk refuzohet dhe duhet të motivohemi dhe duhet të themi: Garoni me ta, por njëkohësisht ruajeni fenë tuaj.

Përktheu: Jeton Shasivari