Autor: Shejkhul-Islam Ibn Tejmijjeh

Burimi: Shkëputur nga libri i tij, er-Rradd ‘alel-Bekri (fq. 256)

“Imamët e Sunetit dhe Xhematit dhe njerëzit e Dijes dhe Imanit kanë drejtësi (‘adl), dituri (‘ilm) dhe mëshirë (rahmeh) dhe ata e njohin të vërtetën që përputhet me Sunetin dhe është e pastër nga bidatet. Ata mbajnë drejtësi ndaj atyre që largohen nga Suneti dhe Xhemati, edhe nëse ata u kanë bërë padrejtësi, siç ka thënë Allahu i Lartësuar:

يَا أَيُّهَا الَّذِينَ آمَنُوا كُونُوا قَوَّامِينَ لِلَّهِ شُهَدَاءَ بِالْقِسْطِ وَلا يَجْرِمَنَّكُمْ شَنَآنُ قَوْمٍ عَلَى أَلا تَعْدِلُوا اعْدِلُوا هُوَ أَقْرَبُ لِلتَّقْوَى

“O ju që besoni. Bëhuni të qëndrueshëm në urdhrat e Allahut dhe bëhuni dëshmues me drejtësi. Le të mos ju shtyjë urrejtja ndaj njerëzve për të bërë padrejtësi. Bëhuni të drejtë, se kjo është më afër devotshmërisë.” [el-Ma’ide, 8]

Gjithashtu, ata janë të mëshirshëm me krijesat dhe duan për ta mirësinë, udhëzimin dhe diturinë. Ata nuk duan kurrë që t’u bëjnë ndonjë dëm apo të keqe. Madje, kur i kritikojnë dhe u shpjegojnë gabimet, injorancën dhe padrejtësinë e tyre, ata kanë për qëllim sqarimin e të vërtetës, duan të jenë të mëshirshëm me krijesat, të urdhërojnë të mirën dhe të ndalojnë të keqen, si dhe ta bëjnë Fjalën e Allahut më të lartën, që rruga e jetës të bëhet me pastërti vetëm për Allahun.”

Përktheu: Alban Malaj