Autor: Abdur-Razzak bin Abdul-Muhsin el-Bedër
Burimi: Mukhtesar Fikh el-Esmaa el-Husnaa, fq. 15-16
Emrat:
Er-Rezzaak (الرَّزَّاقُ) [Furnizuesi i gjithçkaje]
Er-Raazik (الرَّازٍقُ) [Furnizuesi]
Emri i Allahut “er-Rrazzak” është përmendur në Kur'anin fisnik vetëm në një vend, që është Fjala e Allahut të Lartësuar:
﴿إِنَّ اللَّهَ هُوَ الرَّزَّاقُ ذُو الْقُوَّةِ الْمَتِينُ﴾
“Me të vërtetë që Allahu është Furnizuesi, i Cili posedon fuqi të pathyeshme.” [edh-Dharijat, 58]
Ndërsa emri "er-Rraazik" është përmendur në trajtën e shumësit në disa vende; një prej tyre është Fjala e Allahut të Lartësuar:
﴿ وَاللَّهُ خَيْرُ الرَّازِقِينَ﴾
“Allahu është më i miri nga të gjithë furnizuesit.” [el-Xhumu'ah, 11]
Gjithashtu, ai është përmendur në Sunet (hadith), siç do të përmendet më vonë te emrat "El-Kaabid” dhe “El-Baasit".
Allahu - i Pastërti nga çdo mangësi - është Furnizuesi (err-Rrazzaak), që do të thotë se: Ai e ka marrë përsipër furnizimin e njerëzve; Ai e mban çdo gjallesë me furnizimin e përditshëm që ajo ka nevojë. Thotë i Lartësuari:
﴿وَمَا مِنْ دَابَّةٍ فِي الْأَرْضِ إِلَّا عَلَى اللَّهِ رِزْقُهَا ﴾
“Çdo gjallese që është në tokë, Allahu e ka garantuar furnizimin e saj.” [Hud, 6]
Thotë i Lartësuari:
﴿وَكَأَيِّنْ مِنْ دَابَّةٍ لَا تَحْمِلُ رِزْقَهَا اللَّهُ يَرْزُقُهَا وَإِيَّاكُمْ ﴾
“E sa prej gjallesave nuk kanë mundësi ta sigurojnë furnizimin e tyre, kurse Allahu i furnizon ato edhe juve.” [el-Ankebut, 60]
Furnizimi i Allahut për robërit e Tij është dy llojesh:
I pari: Furnizimi i përgjithshëm, i cili përfshin të devotshmin dhe të shthururin, besimtarin dhe qafirin, të parët dhe të fundit, e ky është furnizimi fizik për ta. Thotë i Lartësuari:
﴿وَمَا مِنْ دَابَّةٍ فِي الْأَرْضِ إِلَّا عَلَى اللَّهِ رِزْقُهَا ﴾
“Çdo gjallese që është në tokë, Allahu ia ka garantuar furnizimin e saj.” [Hud, 6]
Duke u bazuar në këtë themi se: nëse dikush ka shumë si ky furnizimi në këtë botë, kjo nuk është argument se ai është i nderuar tek Allahu, ashtu siç nuk është argument furnizimi i pakët i ndonjërit, se ai është i pavlerë tek Allahu.
Thotë i Lartësuari:
﴿فَأَمَّا الْإِنْسَانُ إِذَا مَا ابْتَلَاهُ رَبُّهُ فَأَكْرَمَهُ وَنَعَّمَهُ فَيَقُولُ رَبِّي أَكْرَمَنِ وَأَمَّا إِذَا مَا ابْتَلَاهُ فَقَدَرَ عَلَيْهِ رِزْقَهُ فَيَقُولُ رَبِّي أَهَانَنِ﴾
“E sa për njeriun, kur Zoti i tij e sprovon duke e nderuar dhe duke i dhënë mirësi, ai thotë: “Zoti im më ka nderuar!” Ndërsa kur e sprovon duke ia pakësuar furnizimin e tij, Ai thotë: “Zoti im më ka poshtëruar!” [el-Fexhr, 15-16]
Ky ajet do të thotë se: jo çdokush që Unë e kam begatuar në dynja është i nderuar tek Unë; e jo çdokujt që Unë i kam dhënë pak furnizim në dynja, është i poshtëruar tek Unë. Në të vërtetë, pasuria dhe varfëria, bollëku dhe pakica, janë sprovë dhe testim nga Allahu, që të dallohet se kush është falënderues e kush është mosmirënjohës, kush është durimtar e kush është jodurimtar.
I dyti: Furnizim i veçantë. Ky është furnizimi i zemrave dhe ushqimi i tyre me dije dhe iman.
Gjithashtu hyn furnizimi hallall që e ndihmon robin që të jetë në rregull me fenë e tij. Ky furnizim është i veçantë vetëm për besimtarët, në varësi të gradave të tyre, sipas Urtësisë dhe Mëshirës së Tij. Pastaj, Allahu - i Pastërti nga çdo mangësi - do ta plotësojë Bujarinë dhe Mirësinë e Tij ndaj tyre, duke i futur Ditën e Gjykimit në Xhenetet e begative. Thotë i Lartësuari:
﴿ وَمَنْ يُؤْمِنْ بِاللَّهِ وَيَعْمَلْ صَالِحًا يُدْخِلْهُ جَنَّاتٍ تَجْرِي مِنْ تَحْتِهَا الْأَنْهَارُ خَالِدِينَ فِيهَا أَبَدًا قَدْ أَحْسَنَ اللَّهُ لَهُ رِزْقًا﴾
“E kush beson në Allahun dhe vepron vepra të mira, Ai do ta fusë atë në Xhennete nëpër të cilat rrjedhin lumenj, ku do të qëndrojnë në to përgjithmonë. E sa furnizim të mirë që i ka dhënë Allahu atij!” [et-Talak, 11]
Përktheu: Servet Mata