Vjen dikush e thotë: “Ka thënë Ibën Tejmijjeh!”… “Ka thënë Imam Ahmedi!”… “Ka thënë Shafi’iu”… “Ka thënë Ibnul-Kajjim!”… “Ka thënë shejkh filani!”… “Ka thënë Shejkh Muhamed ibën ‘Abdul-Uehhab!”… “Ka thënë Shejkh Ibën Bazi!”… “Ka thënë shejkh…!” Çështja nuk është që të thuash “Ka thënë… ka thënë… ka thënë… ka thënë…! Khauarixhët e parë nuk thanë: “Ka thënë shejkhu!” – porse thanë: “Ka thënë Allahu i Lartësuar!” E prapëseprapë Sahabët luftuan kundër tyre! Ata thanë: “Ka thënë Allahu i Lartësuar!” Pra, ata nuk kishin fjalë të dijetarëve dhe nuk kishin libra. Kurse këta që janë sot janë më të dobët sesa Khauarixhët e parë sepse këta sot më së shumti përmendin fjalë të dijetarëve që argumentohen shumë me ajetet e paqarta!

Prandaj, fitneja është shumë e madhe në vet diturinë, ngaqë ata të cilët kanë devijim në zemrat e tyre gjithmonë hulumtonin. Kurse sot, ju e dini që fusha e hulumtimit është e lehtë. Vjen dikush dhe i mjafton që të bëjë një librari personale, por për të akoma më të lehtë sesa libraria është që të kërkojë në internet, pastaj nxjerr fjalët e dijetarëve dhe zgjedh vet fjalën e një shejkhu. Pastaj thotë: “Këtë fjalë e ka thënë shejkh filani, e ka thënë imami!” Mirëpo, kjo nuk është dituri! Dituria nuk është kështu, dituria duhet patjetër që të merret nëpërmjet bazave të saj, duhet të mblidhen të gjitha fjalët e dijetarëve dhe të kuptohen e të bëhet dallim mes tyre, ose përndryshe me diturinë kanë për të luajtur fëmijët!

Qysh na qenka kështu pozita e dijetarëve dhe pozita e të qënurit i rrënjosur në dije? Kjo është një çështje shumë e madhe e cila i takon veçse një grupi shumë të vogël njerëzish në Umet sepse përndryshe kanë për të luajtur fëmijët me të! Nuk është çështja që ti të kërkosh dhe pastaj të thuash: “Ka thënë kështu filan dijetari!” Ti duhet patjetër që ta kuptosh çështjen duke studjuar të gjithë diturinë që disponon dijetari. Prandaj ka ardhur në një transmetim:

“Ju do të vazhdoni të jeni në mirësi, për sa kohë që dituria do të jetë te të mëdhenjtë tuaj! Por ama, kur dituria të jetë te të vegjlit tuaj, atëherë ka për të ndodhur fitneja!”

Përktheu: Alban Malaj